KALIBO, Aklan–Nagapanawagan makaron sa Aklan Electric Cooperative (Akelco) ro mga residente nga naka-istar maeapit sa Sitio Bangbang, Brgy. Calizo, Balete angot sa nagakaeayo nga linya it poste it kuryente.
Suno kay Jocelyn Dela Cruz, makapilang beses eon sanda nga naka-eksperyensya it pagdabdab it linya it kuryente kada magsang-it ro punta it butong sa mga kable.
May mga kahigayunan pa sigon nga nagatuga raya it temporaryong pagkaduea it suplay it kuryente ag pag-eupok.
Makabig sigon raya nga delikado bangud nga kung amat hay nagakautod ro porsyon it butong ukon kahoy nga nagasab-eay sa mga kable.
Nagakabaeaka sigon sanda para sa kaeuwasan it andang pamilya bangud posibleng magtuga raya it sunog eabi pa ag kaabuan sa mga panimaeay nga maeapit sa lugar hay himo sa mixed materials.
Bangud kara, naga-apela sanda sa pamunuan it Akelco nga sikyaron ro lugar ag i-mintina ro pagpatigayun it clearing operation para indi raya magtuga it perwisyo.
