KALIBO, Aklan—Nagapabilin nga hugut ro pagpatuman it health and safety protocols sa Kalibo International Airport sa pihak it manaba nga numero it mga pasahero.
Suno kay Civil Aviation Authority of the Philippines ukon CAAP-Aklan manager Engr. Eusebio Monserate, Jr. nga kaeabanan sa mga pasahero hay Locally Stranded Individuals ukon LSIs, Returning Overseas Filipino Workers ag Authorized Person Outside Residence ukon APOR matapos nga owa pa it pagbag-o sa ginpaguwang executive order si Governor Florencio Miraflores angot sa mga ginapasugtan nga makabiyahe pasueod ag paguwa it probinsiya.
Owa man suno kana it pagbag-o sa numero it mga flights it tatlong airline companies, kun sa siin ro PAL hay may ap-at nga flights kada Domingo, ro Cebu Pacific hay may limang flights per week ag ro Air Asia hay may twice a week nga slot.
May mga kahigayunan pa sigon nga nagakansela it flights bangud sa kawad-an it pasahero.
Sa makaron hay naga-average sa 30 hasta 40 ro pasahero sa kada flight.
Mas instriktong suno kana sanda sa pag-usisa sa dokumento it mga nagapaabot nga pasahero kapareho it acceptance halin sa LGU nga paga-ulian, medical certificate, travel authority ag iba pa.
