Nagapabilin nga limitado ro suplay it kuryente sa bilog nga probinsya it Aklan suno sa Akelco
KALIBO, Aklan—Limitado pa ro suplay it kuryente sa bilog nga probinsya it Aklan bangud nga ginahueay-hueay pa it ibang electric power distributor sa isla it Panay ro suplay maghalin sa National Grid Corporation of the Philippines (NGCP).
Suno kay Engr. Jude Ropa, head it engineering department it Aklan Electric Cooperative ukon Akelco, problema sa gihapon ro suplay it kuryente kon sa siin maabo pang mga lugar sa mainland Aklan ro uwa pa it kuryente.
Sigidas man ro ginahimo nandang mga rotational brown-out apang gin-prayoridad nanda ro Isla it Boracay ag banwa it Kalibo.
Sa makaron, indi pa masiguro it Akelco kon san-o makabalik ro estableng suplay it kuryente bangud nga uwa pa it derektiba maghalin sa NGCP.
Ginpahayag dugang ni Ropa nga kon makabalik kunta ro pump reception nga 113 megawatts, bastante eon raya nga makasuplay sa nasambit nga probinsya.
Nagpangayo man it pasaylo si Ropa sa mga kunsumidor bangud sa grid ukon ro transmission it NCGP ro may problema.
Ginpasiguro man kara nga haom man ro nasambit nga kooperatiba sa maabot nga pagpanaeasa it El Nino sa masunod nga mga bineuan sa probinsya it Aklan.
