KALIBO, Aklan—Nagapabilin nga mahina ro mga nagabakae it nagkaeain-eain nga klase it mga bueak sa ginakabig nga ‘Flower Center’ sa Roxas Avenue, Kalibo.
Raya ro ginkumpirma it mismong mga tindero ag tindera sa nasambit nga lugar.
Suno sa sangka flower vendor nga antes ro pagtama it pandemya nga daea it covid 19, haeos magkaubusan eon ro andang mga baligya nga bueak makaron nga bisperas it Valentin’es Day.
Sa makaron suno kana hay nagtaas eon ro presyo it andang mga baligyang bueak partikular ro mga roses nga ro kada stem hay naga-abot sa 70 pesos.
Pwede man sigon nga makabakae it mga bouquet nga naga-umpisa ro presyo sa 300 hasta 1,500 pesos, kun sa siin ro anang presyo hay nakadepende sa mga accessories nga andang ginabutang ag sa numero it mga bueak.
Bangud nga pandemic hay nagabaligya man sanda it bueak online.
Mag-eowas sa bueak , naga-offer man sanda it mga stuffed toys nga ro presyo hay nagahampang sa 250 hasta 350 pesos.
Kaeabanan sigon nga ro andang bueak hay nagahalin sa Baguio City ag Dangwa.
Sangka reseller man ro naabutan it bombo radyo nga nagapamakae it mga bueak nga gin order kana online nga anang iga-deliver hin-aga nga adlaw sa araw ng mga puso.
Sa pihak nga parte, nagaeaum ro mga nagabaligya it bueak nga uman nga magabaskog ro andang kita kon maka-eampuwas eon ro nasyon sa krisis nga daea it covid 19.
