KALIBO, Aklan—Maskinn nga may mga nagabisita eon sa panchon it andang mga mahae sa kabuhi antes pa man nga saraduhan ro gate it mga sementeryo umpisa Oktubre 29 hasta Nobyembre 4, nagapabilin nga mahina ro pagbaligya it mga bueak sa Kalibo flower shop sa kahabon it Roxas Avenue, Kalibo.
Sa interview it Bombo News Team sa mga nagabaligya, ginpahayag it mga raya nga masyadong iba ro sitwasyon makaron kumpara ko nagtaliwan nga mga dinag-on.
Kaeabanan sigon nga buhos eon ro mga nagabakae sa makarondaya nga paniempo, apang makaron hay sangkiri eamang ro mga tawo kamana man ro mga ginabagsak nga supply it mga bueak tuga it pagka-stranded it delivery kara bangud sa pagpanaeasa it bagyong quinta.
Makaron sigon hay puro pre- order ro andang mga baligyang bueak bangud sa limitadong supply.
Pila sa presyo it mga naka-arrange nga bueak hay nagahampang sa 100 hasta 500 pesos depende sa ginagamit nga bueak ag kabahoe.
Sangkiri sigon nga nagsaka ro presyo it mga bueak bangud sa shipment cost it nadelay nga mga bagahe.
Apang stable man ro anang presyo bangud nga owa man ginaeauman nga magaka-ubusan it supply sa tunga it pandemya.
Madumduman nga nagpaguwa it execuitive order ro mga local chief executives angot sa pagpasarado it mga sementeryo agud nga malikawan ro pagbuhos it mga tawo sa pista minatay sa atubang it padayun nga paeag it COVID-19.
