Nag-umpisa ro Pantawid Pamilyang Pilipino Program (4Ps) ko 2007 sa tyempo ni President Gloria Macapagal-Arroyo ag ginpadayun it administrasyon ni dating President Benigno “Noynoy” Aquino.
Ginpabaskog raya sa tyempo ni dating pangueong Rodrigo Duterte kung siin ginhimo ro laye nga RA 11310 ukon ro pagtao it ayuda sa mga pinaka-pobre nga pamilya.
Sa idaeom it laye, obligadong taw-an it cash grant ro mga kwalipikadong pumueoyo.
Ro 4Ps hay national poverty reduction program nga nagatao it bulig-pinansyal sa mga pigadong pamilya sa sueod it pitong dag-on nga ro tuyo hay mapamayad ro andang kaeawasan, , nutrisyon ag makaangkon it edukasyon.
Ro Department of Social Welfare and Development (DSWD) ro nagadumaea sa distribusyon it 4Ps.
Mabuoe it 4Ps beneficiaries ro andang cash grant sa mga banko nga ginmando it DSWD.
Ro tanan nga 4Ps beneficiaries hay covered it National Health Insurance Program.
Kinahang-ean nga makasunod sa criteria ro mga pagataw-an it cash grant agud nga owa it maging problema sa pagbuoe kara.
Kapin sa 15 anyos eon nga ginataw-an it ayuda ro mga pobre sa komunidad.
May una eon nga mga nakatapos sa andang mga unga.
May una eon man nga trabaho ag base may sarili eon nga baeay ag eugtaw.
Apang, ano ro ginapahayag it Commission on Audit (COA) nga 90 porsiyento it mga nagabaton it 4Ps hay pobre pa gihapon.
Suno sa COA, base sa Performance Audit Report (PAR) nga “Follow Up on the Performance Audit on the Pantawid Pamilyang Pilipino Program” nagapabilin pa gihapon nga nabudlayan sa pagpangabuhi ro mga benepisyaryo.
Posibleng may kakueangan ro gobyerno kung ham-an raya hay natabo.
Tinguhaan nga maipasayod sa mga pigado nga gamiton ro kwartang nababaton sa pagpaumwad it andang kabuhi.
Indi permi nga magsalig.
