KALIBO, Aklan—Nagapabilin nga suspendido ro mga bisita sa mga preso sa Bureau of Jail Management and Penology (BJMP-Aklan) tuga it Coronavirus Disease 2019 ukon COVID-19 pandemic.
Suno kay BJMP-Aklan OIC warden, Jail Inspector Joel Laquihon nga hasta sa makaron hay owa ginapasugtan ro bisita sa nasambit nga pasilidad bilang pagsunod sa direktiba it national headquarters agud nga malikawan nga makasueod sa presuhan ro deadly virus.
Nagapatuman suno kana it sistemang “padawat” ukon pwedeng aywan sa jail guard it igbata it mga presu ro mga bueong ukon pagkaon nga supply it mga raya.
Sa pihak nga parte, ginkumpirma ni Laquihon nga pwede eon sandang makabaton it mga gina-remit nga presu, apang maabu nga mga requirements ro kinahangeanon.
Naga-abot sa 155 ro presu makaron sa nasambit nga jail district.
Antes nga mag duty suno kana ro mga personnel hay ginapaidaeum sanda sa quarantine sa sueod it 21 diyas ag sa ika-14 diyas hay iga-swab test ag kon negatibo sa COVID-19, magasueod bilang lock-in duty sa ika-22 diyas it quarantine.
Tig-sang buean suno kana antes nga mabayluhan it ka-relyebo.
Sa makaron hay owa it presung tinamaan it COVID-19, suno kay Laquihon.
Nagaeaum man imaw nga maging maayos ro anang pagdumaea sa pasilidad ag mga katrabaho.
