KALIBO, Aklan—Nagapabilin nga normal pa ro volume it pasahero sa Kalibo International Airport.
Raya hay maskin nga pilang adlaw eon lang ro nabilin antes ro selebrasyon it paskwa.
Suno kay Civil Aviation Authority of the Philippines (CAAP)-Aklan manager Engr. Eusebio Monserate Jr., nagapabilin nga normal ro flow it pasahero sa nasambitang paeoparan kon sa siin kapareho eamang raya sa ordinaryong mga inadlaw nga nagataliwan.
May kaangtanan kara, plastado eon ro andang contingency assistance desk engkaso gid man sigon nga magbuhos ro mga pasahero ag kon may delay sa mga flights sa domestic ag international area.
Ginpahayag dugang nga tayuyon ro andang pagpatuman sa mandato it director general it CAAP nga makaangkon it pay parking sa paeoparan agud nga maregulate ro mga nagasueod nga saeakyan sa passenger terminal building.
Hugot man ro pagsikyar it security officers sa chekpoint area sa mga saeakyan ag pasahero nga nagasueod sa paeoparan.
Suno pa kay Monserate, posible pang madugangan ro mga flights sa KIA sa pagsueod it dag-on 2020 bangud nga may sangka airline company nga nagbakae it eroplano nga intended eamang ro byahe sa nasambitang paeoparan.
