KALIBO, Aklan—Ginpahayag ni Aklan Governor Florencio Miraflores nga nagapabilin ro anang patakaran nga indi pagapasugtan nga makasueod sa probinsiya ro sin-o man nga Locally Stranded Individuals ukon LSIs nga kueang maskin sambilog nga dokumento.
Suno kana nga raya hay nakabaehag sa anang ginpaguwa nga Executive Order.
Ro pahayag hay kasunod it napabalita nga sangka LSI ro uman nga ginpabalik sa anang ginhalinan nga destinasyon sa pagtugpa it andang eroplano sa Kalibo International Airport.
Mag-eowas kara, may una man nga sangka pamilya nga ginaeakipan it 6 nga indibidwal nga naga-insister nga magbakasyon sa Boracay bangud may anda sigon nga confirmed booking sa sangka hotel, apang bangud nga owa it negatibong resulta it RT-PCR test hay uman sanda nga ginpabalik.
Gindugang pa it gobernador nga padayun ro andang pag-instrikto sa border control agud nga indi eon madugangan ro kaso it covid 19 sa probinsiya.
Sambilog sa mga gina-required makaron sa mga LSI hay ro acceptance certificate halin sa natungdan nga LGU.
