KALIBO, Aklan—Nagapadayun makaron ro operasyon it kapitolyo it Aklan matapos nga sangka empleyado kara ro nagpositibo sa coronavirus disease 2019 ukon covid 19.
Suno kay provincial administrator Atty. Selwyn Ibarreta nga matapos ro ginpatigayon nga disinfection sa bilog nga capitol compound hay balik operasyon eon sanda.
Insigida sigon nga ginmandu ni Governor Florencio Miraflores ro contact tracing sa mga posibleng nakasalamuha it nagpositibong empleyado nga sa mayad nga swerte hay owa man raya it natapnan nga katrabaho.
Haeos patapos eon sigon ro quarantine kara kaibahan ro anang mga high risk contact ag nagapabilin sanda nga asymptomatic ukon owa it anuman nga sintomas.
Posibleng sa public transport sigon kara nabo-oe ro virus.
Angot kara, nag apela si Atty. Ibarreta nga padayun nga seryosohon ro pagsunod sa health and safety protocols kamana man nga mag self lockdown makaron nga semana santa.
Base sa listahan it Provincial Health Office ukon PHO Aklan nga naga abot eon sa 1,096 ro kabilugang numero it mga tinamaan it covid 19 sa Aklan.
