KALIBO, Aklan—Nagapadayun ro gobyerno probinsiyal sa andang pag-obra it local public transport route plan ukon LPTRP.
Raya ro ginpahayag ni Engr. Roger Esto, Provincial Planning Development Office ukon PPDO head.
Suno kana nga ko nagtaliwan nga dag-on hay nakasumite eon sanda it LPTRP sa Land Transportation Franchising and Regulatory Board ukon LTFRB apang ginpabalik para sa pilang revisions.
Agud nga mapadasig sigon ro andang trabaho hay nagpangayo eon sanda it bulig halin sa College of Engineering it La Salle para sa pagkompleto it mga technical requirements it LTFRB ag Department of Transportation.
Ginpaathag ni Engr Esto nga nakabaehag sa LPTRP ro mga rota ukon route networks ag numero it mga units nga magabiyahe sa kada rota.
Raya man sigon ro nagapangunang component para sa ginaduso nga Public Utility Vehicle Modernization Program.
Sambilog sigon sa maapektuhan sa pag-modernize it public transport hay ro mga pampasaherong tricycle kun sa siin makaangkon sanda it separadong rota kamana man ro posibleng pag-phase out sa mga habal-habal ag lumang mga saeakyan.
Tanan suno kana nga munisipyo hay required nga magsumite kanda it route plan.
Posible suno kana nga antes nga matapos ro 2022 hay makasumite eon sanda it LTPRP.
Nadelay suno kana ro andang trabaho bangud sa pandemya.
Samtang, bangud sa kawad-an it LTPRP rason nga nabudlayan ro transport sector sa aklan sa pag-renew sa andang mga prangkisa sa LTFRB.
Gin-abisuhan sigon sanda nga magbo-oe lang it certification halin sa natungdan nga planning offices agud nga makabo-oe it franchise.
