KALIBO, Aklan — Bilang pagsunod sa mandato ni Pangueong Rodrigo Duterte, ginmanduan makaron it barangay council it Poblacion, Kalibo, Aklan ro tanan nga mga establisimento komersiyal, mga eskwelahan ag iba pang social institutions nga magbutang it alcohol ag obligahon ro andang mga kliyente nga maggamit kara sa kada magsueod sa andang edipisyo.
Base sa resolusyon nga gindihon ni Barangay Kagawad Mark Sy, ginaengganyo kara ro mga kliyente, customers, estudyante ag mga empleyado nga mag-sanitize it alima gamit ro alcohol bilang kaparte it paglikaw sa nakakamatay nga novel coronavirus (2019)-nCoV.
Ginhinyo man kara sa mga eskwelahan nga maggamit it non-contact infra-red thermometer bangud medyu may kamahaean ro handheld thermal scanner.
Suno kay Kagawad Sy nga ro nasambitang tikang hay bunga it kabaeaka nga makabueo it virus ro mga pumueoyo bangud sa personal contact sa nagkaeain-eain nga tawo nga posibleng may sakit.
