KALIBO, Aklan—Nagatinaas eon ro numero it mga turistang nagabisita sa isla it Boracay.
Sa datos it Municipal Tourism Office it lokal nga gobyerno it Malay, kapin sa 24, 619 eon ro visitor arrivals umpisa Hunyo 1 hasta Hunyo 28.
Suno kay Malay Tourism Officer Felix Delos Santos nga ginaeauman nanda nga magadere-deretso eon ro pagtaas it tourist arrivals agud nga amat-amat eon nga makabawi ro mga negosyante ag trabahador sa isla.
Suno kana nga ro mga turista gihapon halin sa National Capital Region (NCR) Plus ukon Metro Manila, Bulacan, Cavite, Laguna, ag Rizal ro nagapanguna sa mga nagasueod nga turista nga umabot sa 15,710.
Ro iba pang mga turista hay naghalin sa Mindanao ag iba pang parte it Luzon ag Visayas.
Ko nagtaliwan nga buean it Mayo ro isla hay nakalista eamang it 1,737 nga bisita.
Dugang pa ni Delos Santos mag-eowas sa 11 turistang nadakpan makaron nga Hunyo sa uman nga pagbukas it Boracay sa mga taga-NCR, owa eon it iba pang naghana nga maggamit it pekeng negatibong RT-PCR test result agud nga makasueod sa isla.
