KALIBO, Aklan—Pormal eon nga naproklamar it Commission on Election ukon Comelec Aklan ro mga nagdaeaog nga kandidato sa banwa it Kalibo sa kakatapos eamang nga 2022 national and local election.
Ginkilaea bilang bag-ong alkalde it banwa si dating 1st District Sangguniang Panlalawigan member Juris Sucro.
Naangkon ni Sucro ro kadaeag-an matapos makalista it 25,907 votes nga mas mataas kumpara sa kaengkwentru nga si Mayor Emerson Lachica nga nakabo-oe it 18,968 nga boto.
Samtang, uman nga magapungko bilang bise alkalde ro running mate kara nga si Dr. Cynthia Dela Cruz nga nakabueo it 25,788 nga boto.
Sa pihak kara, nagapabilin man sa konseho sa ikatlong termino si SB member Phillip Kimpo nga nakabueo it 22,124 votes.
Ginsundan it abogada nga si Atty. Christine Dela Cruz nga nakalista it 21,262 nga boto.
Proklamado eon man bilang SB member si Andagao punong barangay William Lachica Jr. nga nakaangkon it 19,863 votes.
Nagapabilin man sa pwesto sa konseho si SB member Matt Aarron Guzman nga may 18,651 nga boto.
Ginsundan raya ni Ketchie Luces nga nakabueo it 18,313 votes ag Raymar Rebaldo nga nakalista it 17,762 nga boto.
Nailihir it uman sa pwesto si SB member Augusto Tolentino nga nakaangkon it 15,217 votes kamana man si Ronald Marte nga nakalista it 14,972 nga boto kon siin raya man ro anang unang termino bilang konsehal it banwa it Kalibo.
