Ap-at nga banwa eon sa probinsiya it Aklan ro nagdeklara it state of calamity bangud sa epekto it El Niño sa mga pananum nga mais, paeay, ag iba pang high value crops.
Raya hay ginaeakipan it banwa it Kalibo, Buruanga, Ibajay ag Batan.
Suno kay Engr. Alexys Apolonio, provincial agriculture officer, gin-abisuhan nanda ro iba pang banwa sa Aklan nga magsumite it damage assessment report agud nga matumod ro kabilugan nga kahalitan it El Niño sa bilog nga probinsya.
Bangud nga ap-at eon suno kana nga banwa ro ginpaidaeum sa state of calamity, ginpahayag ni Apolonio nga posibleng ideklara ro state of calamity sa bilog nga probinsya it Aklan.
Aminado man ro opisyal nga umpisa ko ulihing cropping it 2023 hasta unang cropping it 2024 hay nakalista eon it kahalitan matapos nga owa nakapagtanum ro mga mangunguma tuga it masyadong mamaea nga ueumhan kamana man ro mga mangingisda sa pagkahubas it mga paeangisdaan.
Base sa datos umpisa Agosto 2023 hasta Mayo 31, 2024, nag-abot eon sa P142 milyon ro balor it kahalitan sa mga pananum ag paeangisdaan halin sa 17 nga banwa sa Aklan.
Mabahoe nga apektado kara ro mga pananum nga paeay nga nakalista it kahalitan nga P80 milyon nga ginsundan it mga high value crops partikular ro mga tinuean-on ag prutas nga may damages nga P42 milyon; kamaisan nga P8 milyon; livestock and poultry nga P6 milyon ag may una man sa paeangisdaan.
Angot kara, ginsumite it Provincial Agriculture Office ro natipon nga datos sa Provincial Disaster Risk Reduction and Management Council ukon PDRRMC kun sa siin ro resolusyon it konseho nga nagarekomenda nga ideklara sa state of calamity ro bilog nga probinsiya hay sa taeatapan eon ni Governor Joen Miraflores ag ginahueat eon lang ro pag-endorso kara sa Sangguniang Panlalawigan para sa nagakaigo nga assessment ag pagtalakay.
Ko nagtaliwan nga mga binuean hay nag-umpisa eon man ro mga local government units ukon LGUs nga magpanupod it assistance sa mga apektadong sektor.