KALIBO, Aklan—Naghina ro pagpasueod it illegal nga droga sa probinsiya it aklan ko nagtaliwan nga dag-on bangud sa ginapatuman nga lockdown tuga it coronavirus disease (COVID-19) pandemic.
Suno kay Provincial Drug Enforcement Unit ukon PDEU head, P/Major Frenzy Andrade nga kapin sa 15 hasta 16 nga anti-illegal drug operations ro andang ginpatigayon ko 2020 kun sa siin mas manaba ro nasambit nga numero kun igakumpara sa nailista ko 2019.
Naging mabudlay suno kana sa mga nagaduso it droga nga mag-operate bangud nga kaabuan sa mga tawo hay sa sueod eamang it baeay tuga it quarantine restrictions.
Gindugang pa ni Major Andrade nga antes tumama ro pandemya hay naging mas hugut ag sunud-sunod ro andang operasyon partikular kat ginlunsar ro oplan tokhang.
Kanugon suno kana nga pila sa mga gintaw-an it kahigayunan pinaagi sa plea bargaining agreement hay uman nga nagbalik sa pagduso it illegal nga droga rason nga balik presuhan man ro mga raya.
Kaeabanan suno kana nga naga sueod nga droga sa aklan hay halin sa manila ag kaiping nga mga probinsiya eabi pa ag nagbukas eon man ro mga pantalan.
Pila sa andang naka-transaksyon hay ginapaagi sa social media.
Kapareho it nadakpan nga mag-igkampod nga aklanon sa cavite ko nagtaliwan nga mga inadlaw nga may bitbit nga milyones nga balor it droga, kun sa siin sambilog man raya sa andang gina monitor.
Mag-eowas kara, todo alerto man sanda sa mga droga nga ginapadaea pinaagi sa courier.
