KALIBO, Aklan—Naging impresibo ro inaugural speech ni Pangueong Ferdinand ‘Bongbong’ Marcos, Jr. kahapon nga nagpungko bilang ika-17 nga presidente it Pilipinas.
Apang suno kay Atty. Harry Sucgang nga medyu nakueangan imaw matapos nga owa matalakay ro posibleng maging solusyon sa maeapnagon nga problema sa korapsyon nga imaw ro eubus nga nagapa-antus sa mga pumueuyung pilipinhon.
Matapos nga ginmitlang sigon kara ro reflection sa nagtaliwan nga campaign period, nag-apela imaw it pagbuylog it tanan agud nga maabot ro ginahandum nga kamaeayran para sa nasyon.
Raya suno kay atty sucgang hay manami nga puntos kamana man ro pagpaiway ni PBBM nga matalakay ro nagtaliwan ag magatutok sa paeaabuton.
Sa pihak nga parte, gindayaw man ni Atty. Sucgang ro bag-ong pungko nga presidente bangud sa pag-angkon it ikasarang nga magpili it mga ginbutang nga tawo nga magadumea sa mga ahensiya it gobyerno.
Suno kana nga nagakabagay nga ro ibutang sa pwesto hay ro mga opisyal nga may ikasarang ag maeawig nga experiensiya kamana man nga bukon it korap bangud nga sanda ro magiging kabulig kara sa pagpatikang it nasyon.
Ginaduso man nana nga maging halimbawa si Marcos sa pagbayad it buwis agud nga magabaskog ro tax collection it gobyerno.
Sa pihak it maabu nga mga hangkat ro paga atubangon it bag-ong administrasyon, ro importante suno kana hay maabu sa mga pumueuyu ro nagasalig sa bag-ong gobyerno nga uman kita nga magabangon rason nga taw-an it chansa ro pagdumaea ni pangueong Marcos.
