KALIBO, Aklan—Naging kalmado eon ro sitwasyon sa Estados Unidos kasunod it pag-collapse it daywang major banks sa nasambit nga nasyon.
Suno kay Bombo International Correspondent Greg Aguilar it California, USA nga raya hay kasunod it pagpasiguro ni US President Joe Biden nga nagapabilin nga eowas ro banking system.
Kadungan kara, ginduea man sigon ni Biden ro pagkabaeaka it publiko angot sa ginakabaeak-an nga financial crisis bangud sa natabu.
Ginpahayag ni Aguilar nga naging mayad ro pamaagi it gobyerno kun sa siin ginpasiguro sa mga customers nga protektado ag masaligan gihapon ro banking system it nasyon.
Apang nagpaandam si Biden nga magapanabat ro responsabli sa insidente ag igaduso ro mas mayad nga regulasyon sa mga mabahoe nga banko .
Gindugang pa nga indi makaangkon it kapierdihan ro mga depositors bangud nga igabalik ro andang mga kwarta.
Kaibahan kara ro mga maintok nga negosyante nga may deposito sa nasambit nga mga banko.
Madumduman nga ginpasarado it US regulators ro Silicon Valley Bank matapos nga makaexperiensiya it traditional bank run, kun sa siin ro mga depositors hay dumagsa agud nga i- withdraw ro andang mga ginpatago nga kwarta.
Mag-eowas sa Silicon Valley Bank, nagcollapse man ro Signature Bank nga nakabase sa New York.
Raya ro ikaywang pinakamabahoe nga bank failure sa kasaysayan it nasyon nga ro una hay natabu ko 2008 kat magsarado man ro Washington Mutual.
