KALIBO, Aklan—Naging maayos ro unang adlaw it pagpatigayun it vaccination rollout sa probinsya it Aklan, kahapon Marso 10.
Raya hay matapos nga madinaeag-on nga nabakunahan ro kapin sa 200 healthcare workers gamit ro Sinovac vaccine nga donasyon it Chinese government sa Pilipinas.
Suno kay Dr. Vic Sta. Maria it Provincial Health Office (PHO)-Aklan nga ro unang ginbakunahan hay mga ro doktor, nurse ag iba pang staff it Dr. Rafael S. Tumbukon Memorial Hospital kamana man ro pilang doktor it pribadong ospital sa Kalibo.
Nasayuran nga sambilog ro DRSTMH sa mga ospital nga nagatatap it mga pasyenteng may Coronavirus Disease 2019 ukon COVID-19.
Ginklaro man ni Dr. Sta. Maria nga ro pagpabakuna it mga medical frontliners hay voluntary ag owa ro mga raya ginpilit.
Samtang, kahapon hay nag-abot eon man sa Western Visayas ro kapin sa 5,000 doses it AstraZeneca vaccine nga gintaeana para sa mga senior citizen nga healthcare workers sa bilog nga rehiyon.
