KALIBO, Aklan—Naging madinaeag-on ro mas pang ginpabaskog nga anti-criminality campaign it Police Regional Office ukon PRO-6.
Suno kay PMaj. Mary Grace Socorro Didulo Borio, OIC, Regional Public Information Officer nga base sa datos, sa ginpatigayon nga kampanya kontra sa iligal nga droga, natigayon nga nakakumpiska it kapin sa P96 milyon pesos nga balor it illegal drugs halin sa 415 nga police operations regionwide umpisa Hulyo 1, 2022 hasta Setyembre 26, 2022.
Kapin sa 516 nga indibidwal ro napasakaan it kaso.
Samtang, sa kabilugan nga 701 nga illegal gambling operations, nakakumpiska it 463,000 nga bet money ukon taya ag napasakaan it kaso ro kapin 108 nga indibidwal.
Ro PNP hay naka-aresto man it 133 nga indibidwal sa kampanya kontra sa loose firearms, kun sa siin 31 ro ginpasaka nga kaso sa korte.
Naga-abot man sa 1,048 nga armas ro nakumpiska samtang ro iba hay ginsurender ag narekober halin sa pilang indibidwal ag mga armadong grupo.
Sa pihak nga parte, sa 1,394 nga ginkasa nga operasyon, naka-aresto ro kapulisan it 1,445 nga most wanted persons ag ap-at ro nagsurender.
Kaibahan sa nasambit nga accomplishment ro pagka-aresto ko Miyerkules sa banwa it Makato sa sangka top 1 most wanted person sa banwa it Kalibo it gintingub nga pwersa it Makato ag Kalibo municipal police stations.
