Kalibo Aklan ——-Ro luslos ukon hernia hay ro pageusot it pilang mga organ sa matapok nga parte it abdominal wall.
Ro kaeabanan nga halimbawa kara hay ro pageusot it tina-i paagto sa singit rason nga nakaaangkon it pag-umbok sa raya nga parte.
Pila sa mga kaeabanan nga rason it luslos hay ro grabeng pag-iri samtang nga nagahigku; mabaskog nga pag ubo; grabeng katambok; paghakwat it mabug-at nga bagay ; pagpanigarilyo; owa pag-angkon it tamang nutrisyon; pag-angkon it congenital birth defect; pagkasamad it abdominal wall bangud sa operasyon; pagnabdos ; ag pag-angkon it grabeng tubi sa tiyan ukon ascites.
Pila sa mga sintomas kara hay ro pagbahoe it kinatawo sa kaeaeakin-an; pag-angkon it bukoe sa apektadong parte kapareho it singit; pag-angkon it nagahaeok nga pamatyagan; pagsakit ukon pagkirot it apektadong parte; pagsakit it apektadong parte kon nagatindog , naga ubo ag naga hakwat; sangkiri nga pagkaduea it bukoe ukon pagsakit kon naga-eubog; pagsuka; pag aslum , kabudlay sa pagtueon ag pagsakit it dughan.
Agud nga makalikaw, dapat nga punduhon ro pagsigarilyo agud nga indi makaangkon it chronic cough nga posibleng magtuga it luslos.
Ipabilin ro tamang timbang pinaagi sa pagkaon it balanse ag masustansiyang pagkaon ag pag-ehersisyo.
Likawan ro grabeng pag-iri samtang nagahigku ag mag inom it bastanteng tubi agud nga maghumok ro higku .
Likawan ro paghakwat it mga mabug-at nga bagay.
