KALIBO, Aklan—Ginbaha ro nagkaeain-eain nga lugar sa probinsiya it Aklan eabi eon sa banwa it Kalibo matapos ro dere-deretso nga pagbuhos it uean umpisa kahapon, adlaw it domingo.
Suno kay Provincial Disaster Risk Reduction and Management Office (PDRRMO) officer Galo Ibardolasa nga Sabado pa eamang hay ginpapahaum eon nana ro 17 nga pamunuan it MDRRMO sa probinsiya.
Naka-experiensoya it hasta gutter-level nga tubi baha ro mga residente, saeakyan ag motorsiklo sa pilang kalye sa banwa it Kalibo rason nga medyu mabudlay ro andang pag-agi.
Mag-eowas kara, sangkiri man nga nagtaas ro lebel it tubi sa Aklan River rason nga gin alerto it mga opisyal it barangay ro mga residenteng naga-istar maeapit sa suba.
Gindugang pa ni Ibardolasa nga pilang residente sa Brgy. Cerrudo, Banga ro gin-evacuate hali sa andang mga baeay.
Nakalista man sigon sanda it mga maintok nga paghugos it eugta.
Samtang, temporaryong ginkansela ro biyahe it mga motorbanca paagto sa isla it Boracay, kun sa siin nakalista it pilang mga stranded nga pasahero sa tabon port kamana man ro biyahe it mga RoRo vessel paagto sa Mindoro. Gindugang pa ni Ibardolasa nga posibleng hasta hin-aga nga adlaw it martes pa magabuhay ro makarondayang kondisyon it tiempo rason nga ginalaygayan ro mga residenteng apektado nga maging haum.
