KALIBO, Aklan–Mabahoe nga perwisyo makaron sa mga residente ro sangkaterba ag mabaho nga basura nga nakatambak sa Material Recovery Facility (MRF) sa bahin it Brgy. Manoc-manoc sa isla it Boracay.
Bangud kara, naga-apela si Punong Barangay Nixon Sualog sa lokal nga gobyerno it Malay nga makaangkon it insigidang solusyon eabi pa ag amat-amat eon nga nagapagsik ro turismo sa isla.
Nagakabeaka si Sualog nga base masamad ro imahe it Boracay engkaso nga matueopangdan ag mabue-an it litrato it mga turista ro mga nakakalhit nga basura.
Base sigon sa ginpatigayun nga imbestigasyon it andang barangay, natukiban nga kueang ro truck it ECOS Sanitary Landfill and Waste Management Corporation nga naka-kontrata sa paghakot it mga basura rason nga nagapabilin nga nakatambak ro mga raya.
Dapat sigon nga unahon ro public safety eabi pa ag nagakasakit eon ro pilang residente.
Ginsuhestiyon pa ni Kapitan Sualog nga engkaso nga nakaangkon it violation ro kompaniya sa ginpirmahan nga kontrata mas mayad kun i-terminate eon lang raya ag ibalik ro Republic Act 9003 kung siin ro tatlong ka mga barangay sa isla ro magamanihar it basura.
Nasayuran nga naga-abot sa P300 million ro pondo kada dag-on para sa pagkolekta it basura sa Boracay.
