KALIBO, Aklan—Sangka eaeaki nga ginasugid nga nagpakilaeang miyembro it New People’s Army (NPA) ro nadakpan sa sangka entrapment operation matapos nga kotongan ro sangka negosyanteng nagapanag-iya it sangka construction firm sa parking area it sangka hardware depot sa Barangay Calangcang, Makato, Aklan.
Ro suspek nga presenteng naka-hospital arrest hay ginkilaea kay Prince Igudas, 34-anyos ag residente it Lahog, Tapaz, Capiz.
Suno sa inisyal nga imbestigasyon it kapulisan, nagpangayo ro suspek sa owa anay ginpangaeanan nga biktima it kwarta bilang revolutionary tax it anang negosyo.
Suno kay P/Major Jason Belcenia, hepe it provincial intelligence unit it APPO nga P15 milyon ro unang ginapangayu nga kantidad nga ko ulihi hay nagnaba sa P5 milyon hasta nga ko ulihi hay naging P1.5 milyon eon lang.
Nag-demand pa sigon ro suspek nga sa Iloilo obrahon ro transaksyon, apang nagpamalibad ro biktima hasta nga naghinyu raya nga sa Roxas City, kun sa siin ko ulihi hay nagkaeasugot nga iya eon lang sa Aklan.
Nasayuran nga haeos sang domingo man ro ginpatigayon nga transaksyon sa suspek.
Tago sa kasayuran it suspek nga nagdangop sa Aklan Police Provincial Office ukon APPO ro biktima nga nagkasa it sangka entrapment operation nga nagresulta sa pagkadakop sa suspek.
Nakaangkon raya it lastro sa hita matapos nga mabarilan kat magsukoe sa kapulisan.
Kaibahan sa operasyon ro mga katapo it Philippine Army.
Nabo-oe sa suspek ro sangka granada, sangka bundle it boodle money nga nagabalor it P1.5 milyon nga gingamit sa operasyon, 3 cellphone nga de-keypad, wallet ag iba pang dokumento.
Sa makaron hay ginatumod pa it kapulisan kon matuod nga miyembro it NPA ro suspek.
Gina-imbestigahan man ro kaibahan kara nga sangka babaye ag ro driver it taxi nga andang gin arkila halin sa Iloilo kon may kahilabtanan sa krimen.
Engkaso nga bukon it kaibahan, posibleng obrahon nga testigo ro taxi driver.
