KALIBO, Aklan — Nagapangatubang sa kasong robbery ro sangka house helper it pamilya Quimpo nga responsabli sa pagpanakaw it andang kwarta ag mga gamit matapos ro follow-up operation sa andang panimaeay sa Brgy. Bakhaw Sur, kalibo.
Nakilaea ro suspek nga si Christopher Bonifacio, 44, residente it nasambit nga lugar ag naga-trabaho sa panimaeay it pamilya Quimpo sa Brgy. Old Buswang, kalibo.
Ginpatigayon ro operasyon matapos ireklamo ro suspek tuga it pagbo-oe kara sa P6,500 nga cash, cellphone, mini IPad, power bank, mga shades ag lotion.
Nabo-oe ro mga tinakawan nga items nga gin-eubong sa eugta maeapit sa baeay it suspek.
Base sa pag-usisa, si Bonifacio hay haeos limang buean pa eamang nga house helper it pamilya Quimpo kun sa siin sa sueod it nasambit nga tiempo hay gintaw-an raya it pagsalig it pamilya.
Samtang, aminado ro suspek sa nahimo nga krimen ag ginasugid nga nahimo eamang nana raya tuga it kahilungon.
Nasayuran nga nakulong eon si Bonifacio it haeos 12 anyos bangud man sa kasong pagpanakaw.
