KALIBO, Aklan—Nagpatigayon it ocular inspection ro korte may kaangtanan sa kaso it pagpatay sa 23-anyos nga si Jennifer Zaulda nga nasapwan nga hub-eas ag naga-eutaw-eutaw sa irigasyon sa Brgy. Mataphao, New Washington, Aklan ko nagtaliwan nga Agosto 22, 2019.
Kaibahan nga nag-agto agud nga personal nga usisaon ro crime scene hay ro judge, prosekusyon, abogado it akusado ag New Washington police station.
Ginsukat nanda ro lugar halin sa baeay it SK chairman nga gin-agtunan it suspek ag biktima nga ginasugid nga parehong nagtambong sa birthday party paagto sa lugar nga nasapwan ro bangkay ni Zaulda.
Kamana man ro iba pang mga gamit nga narekober.
Nasayuran nga ro suspek nga si Rockson “alyas Bombay” Roque nga nagapangatubang sa kasong rape with homicide hay temporaryong nakahilway matapos nga makabayad it piyansa nga P75,000 ko Enero 14, 2020.’
Ginklaru nga nakapiyansa imaw matapos nga mabasura ro kasong rape tuga it kakueangan it mabakod nga ebidensiya ag owa nagakasinanto nga mga pahayag it mga testigo.
