KALIBO, Aklan—Nagsaka eon sa 18 ro numero it namatay sa pagkahueog it pampasaherong bus sa madaeum nga banglid sa Barangay Igbucagay, Hamtic, Antique, bandang alas-4:30 it hapon ko Martes, Disyembre 5.
Ginkumpirma ni Junlee Saylo, OIC public information office it office of the governor it provincial government it Antique nga namatay ro sambilog pa sa mga pasahero it ceres bus samtang ginabueong sa sangka ospital sa Iloilo City.
Sa makaron hay kapin sa 6 pa ro kritikal samtang ap-at ro una eon sa establi nga kundisyon sa Angel Salazar memorial hospital sa San Jose, Antique.
Nasayuran nga kaibahan sa mga namatay hay ro driver it bus; kundoktor ag ro inspector.
Nagtukod eon sigon it help desk ro Vallacar Transit Incorporated sa magkaseparadong ospital nga gindaehan it mga pasahero agud nga insigidang mataw-an it aksyon ro andang mga kinahangeanon.
Nauna eon nga nag-tau it tig-20,000 pesos nga financial assistance si governor Rhodora Cadiao sa pamilya it mga namatayan ag nagtanyag man it financial aid sa mga naospital agud nga mapahagan-hagan ro andang kalisod.
Sa pihak nga parte, ginsaysay sigon it sangka survivor nga pag-abot pa eamang nanda sa welcome arc sa Antique hay sigidas ro pagbinusina it driver hasta nga bumangga ro andang bus sa barrier sa kilid it national highway ag eubusan nga inapok sa banglid nga may kataason nga 70 feet.
Ginakabig sigon ro lugar nga accident prone area bangud sa design it karsada nga matsa killer curve nga korteng S.
Ginaboebanta nga 10 eon ro aksidente nga nag-eontad sa lugar kun sa siin kapin sa ap-at pa nga saeakyan ro owa nabo-oe sa ubos it banglid.
Ginpahayag pa ni saylo nga nauna eon nga nagsueat si governor cadiao kaibahan ro andang resolusyon sa regional development council agud nga ipaabot sa Department of Public Works and Highways ukon DPWH ro andang concern nga i-condemn ro karsada ag mag-obra it bag-ong daean bangud nga masyadong delikado ro lugar.
Hasta sa makaron sigon hay nagaeaum sanda nga mataw-an raya it nagakaigo nga aksyon .
