Kalibo, Aklan-Pinatay it anang mismong amigo si Francis Dela Cruz ro eaeaki nga gina-alegar nga naeumos ag nasapwan nga nagaeutaw sa may bahin it Aklan River. Pahayag ni Shiela Mae Tabiolo igmanghod it biktima nga nagsurrender ro suspek nga si Ronmar Ortega ku Hulyo 28 it gabei kun siin nga nagpahatod raya para nga mag-adto sa police station.
Pagsalarawan nana sa suspek nakakatagayan it anang magueang ro supek ag apisar nga uwa nana nakaka-istorya hay kun basehan medyo masaligan ro tawo. Nagkilaea ro biktima ag suspek bangud man sa sangka indibiwal nga pareho man nanda nga amigo. Gabei antes maduea ro biktima nag-inuman pa sanda sa mismong baeay ni Dela Cruz.
Dugang ni Tabiolo nga nakita pa ro tsinelas it andang magueang kat raya hay nainusoy sa baeay ni Ortega. Pursigido man sanda nga makita ro andang magueang, ag nagpabulig sanda nga magpablotter sa suspek bangud nga raya ro ulihi nga kaibahan it biktima. Panugiron sigon it suspek nga paghalin sa estaka hay nag-angkon sanda it diskusyon kun siin anang gintik-eod ro biktima rason nga naeumos ag dugang pa nga may ininom.
Sa makaron ginpasakaan eun it kaso ro suspek. Antes sigon nga magsurrender hay nagbulig-bulig pa ro suspek sa namatyan. Dugang pa ni Tabiolo nga indi man nanda sa gihapon mabaton ro temprano nga kamatayon it andang kapamilya.
