KALIBO, Aklan–Ginkilaea it sangka onga ro paghimakas it anang tatay nga mapaeskwela sanda nga magmaeanghod.
Si Ruthsel Cuadernal hay nagtapos nga Magna Cum Laude sa Aklan State University Banga Campus sa kursong Bachelor of Arts in English.
Suno kana, kamanghuran imaw magmanghod kon sa siin nabatyagan gid nana ro suporta it anang bilog nga pamilya eabi eon ro kumpyansa nga ginta-o kana it anang ama bilang babaye nga onga.
Sa anang journey sa pag-eskwela hay haeos inde eon imaw kauli sa andang panimaeay bangud sa kasakuon apang bilog gihapon ro pagsalig kana it anang mga ginikanan eabi eon gid it anang ama nga eubus man nana raya nga ginapasaeamatan.
Inde suno kana matupungan ro dedikasyon ag pagiging responsable it haligi it andang panimaeay rason nga ginahaead gid nana sa anang ginikanan ro latin honor nga naangkon sa anang pagtapos sa kolehiyo.
