NATIONAL News —- Uman nga ginaduso nga ibalik sa dating pangaean ro Ninoy Aquino International Airport ukon NAIA.
Sa House Bill 10833 nga gindihon it Duterte Youth Partylist hay ginapabalik sa Manila International Airport ukon MIA ro presenteng NAIA.
Ginarason sa proposisyon nga ro pangaean it “international gateway” it nasyon hay indi dapat nga mapulitika.
Madumduman nga pinatay si dating Senador Ninoy Aquino sa paeuparan ko Agosto 21, 1983 ag sa termino it anang asawang si dating Pangueong Corazon Aquino ko 1987 hay naging laye ro Republic Act 6639 nga nagatuyo nga bag-uhon ro pangaean it airport bilang NAIA.
Ginpamilit pa sa proposisyon nga mas madali sigon para sa mga dumueuong ag turista nga mausoy ro nasyon ag ro international gateway kun raya hay nakapangaean sandig sa kabisera it Pilipinas.
Nagapati man ro author it proposed bill nga kon uman nga ibalik ro pangaean nga Manila International Airport, mas magatau raya it “sense of national pride” para sa minilyong Pilipino.
