KALIBO, Aklan—Naispatan sa Boracay ro pilang Korean celebrities nga gina-enjoy ro manami nga beach, sunrise, ag sunset nga nagapamatuod sa kasikatan it isla sa mga Koreano.
Pila sa mga raya hay ro kilaeang actor nga sanday Kwangil Seo ag Kim Dong Won it global phenomenon nga Squid Game.
Ginkumpirma it management it Jony’s Beach Resort nga nagtinir ro mga raya sa andang resort sa Station 1 sa sueod it limang adlaw ag ap-at nga gabi-i.
Sa pihak nga parte, ginkalipay it mga hotel and resort owners sa Boracay ro padayun nga pagtaas it andang occupancy rate nga naga-abot sa 90 percent kada weekend ag may average nga 75 hasta 80 percent kada weekdays.
Samtang, naga-abot eon sa masobra sa 1.17 milyon ro mga turistang nagabisita sa Boracay umpisa Enero hasta Agosto 27, 2022.
Umpisa nga buksan ro border it nasyon ko Pebrero 10 hasta Agosto 27, nakalista it 53,718 nga foreign tourists.
Sa nasambit nga numero, 20,984 ro naghalin sa South Korea kasunod it pag-angkon it direct flight halin sa Incheon airport paagto sa Kalibo international airport.
Bangud kara, uman nga nagsoeputan ro mga Korean restaurants nga dati eon nga nagsarado bangud sa pandemya.
Ko 2019 antes ro pagpanaeasa it COVID 19 pandemic, kapin sa 2 million ro tourist arrivals sa isla, kun sa siin nagapangaywa ro mga Koreano kasunod it mga Chinese.
