KALIBO, Aklan—Naka full alert status eon ro miyembro it Kalibo PNP sa ginaeaumang pag-aeabutan it mga deboto ni Sr. Sto. Niño de Kalibo agud nga mag-atendir it misa sa mismong kapyestahan kara sa adlaw it Sabado hasta it dominggo.
Suno kay P/Major Belshazzar Villanoche, hepe it Kalibo PNP nga gin-umpisahan eon nanda ro deployment it police force sa mismong compound ag palibot it St. Jhon the Baptist Cathedral agud nga mag-alalay ag masikyar ro kaeowasan it mga parishioners.
Kinahang-ean suno kana ro pwersa it pulisya agud nga ma-maintain ro mga ginapatuman nga safety ag health protocols partikular ro pag-obserba it physical distancing, pagsuksok it face mask ag face shield.
Mag-eowas kara, nakataeana man nga igasarado ro palibot it Pastrana park agud nga taw-an it daean ro mga parishioners engkaso nga inde eon ro mga raya mag-igo sa compound it Kalibo Cathedral.
May mga nakabutang nga markings maging sa karsada agud nga mapractice ro physical distancing bangud nga maskin uwa it merry making ukon street dancing hay padayon gihapon ro selebrasyon ag aktibidad it simbahan.
Gin-engganyo man kara ro mga indibidwal nga vulnerable sa sakit nga Covid-19 nga magpabilin eon lang sa andang panimaeay ag makontento eon lang anay sa live telecast ukon broadcast it misa.
Samtang sa pihak nga parte, nagapadayon ro pag-asister it Kalibo PNP sa LGU sa pagpatigayon it road clearing.
Ro naging problema eamang sigon nanda hay ro mga illegal parking ag ro mga sidewalk vendors nga nagabalik-balik gihapon sa andang pwesto maskin pilang beses eon ro mga raya nga namultahan ag napahalin.
