KALIBO, Aklan—Nakaangkon eon it settlement sa tunga it driver it mga behikulong imbolbado sa nag-eontad nga aksidente sa national highway nga sakop it Brgy. Panayakan, Tangalan.
Suno kay PSSgt. John Mijares, imbestigador it Tangalan Police Station nga nagaguwa sa andang imbestigayon nga ro photon type van nga ginamaneho ni Jury Reyes ro nakaangkon it aberya matapos nga owa kara makontrol ro manubela tuga it madanlog nga daean.
Kaibahan sigon ni Reyes ro sangka helper nga nakilaea kay Romel Gayor, 36-anyos, parehong residente it banwa it Numancia.
Bangud sa insidente, bumungga ro behikulo sa sangka container truck nga ginamaneho ni Arnel Arguelles, 37-anyos, residente it samtang ro kaibahan kara hay nakilaea kay Rodulfo Culanggo, 27-anyos, parehong residente it Roxas City, Capiz.
Bangud sa impact hay bumaeabag ro container truck sa karsada ag natigayun nga mahueog ro mga kargang balikbayan box kara nga iga-deliver kunta sa Brgy. Naisud, Ibajay.
Ro daywang mga behikulo hay parehong nag-angkon it kasamaran kung siin nagpromisa man sigon si Reyes nga pagasabton kara ro gintuga nga danyos it insidente.
