KALIBO, Aklan—Nakaangkon it tatlong bag-ong kaso it Coronavirus Disease 2019 ukon COVID-19 sa Barangay Poblacion, Kalibo.
Suno kay Punong Barangay Niel Candelario nga ro daywa kara hay mga empleyado it barangay hall nga natapnan sa andang ikaywang kaso nga na-assign sa Information and Technology ukon IT department.
Owa sigon naeakip ro mga raya sa unang batch it mga ginpaidaeum sa covid swab test bangud nga owa sanda nakaangkon it direct contact sa andang unang empleyado nga sangka tanod nga nagpositibo sa sakit.
Taga-purok 1 ag purok 6 sigon it C. Laserna St. Kalibo ro daywa.
Samtang, ro ikatlong kaso hay miyembro it pamilya it nasambit nga empleyado.
Ginpahayag pa ni Kapitan Candelario nga presenteng nakaquarantine ro mga raya ag nagapatigayon eon it contact tracing sa iba pa nanda nga mga nakasalamuha.
Sa pihak nga parte, sangka resolusyon sigon ro andang ginbaeay nga nagarekomenda nga ipaidaeum sa surgical lockdown ro portion it estaka, apang hasta sa makaron hay owa pa nakapaguwa it executive order ro local inter-agency task force.
Ginklaru pa ni kapitan candelario nga owa nakasueod sa barangay hall ro mga empleyadong bag-ong nagpositibo sa makamaeatay nga virus bangud nga kaibahan sanda sa mga ginmanduan nga mag self quarantine.
Madumduman nga temporaryo nga ginsaraduhan ro andang barangay hall agud nga taw-an it daean ro massive disinfection ag ko lunes eamang raya ginbuksan.
Ginpaabot pa it opisyal nga ro andang operasyon hay naga-umpisa alas-9 it agahon hasta alas-4 it hapon pinaagi sa limitadong numero it mga empleyado.
