KALIBO, Aklan—Sa pihak it naexperiensiyahan nga pagmaltrato, plano sa gihapon it overseas Filipino worker ukon OFW nga si Aljen Beltran it Brgy. Libas, Banga nga magtrabaho sa ibang nasyon, apang bukon eon it sa Saudi Arabia.
Suno kana nga nakaka-trauma ro magtrabaho sa nasambit nga nasyon bangud nga mag-eowas nga mapintas ro mga pumueuyu hay may pagka-manyakis pa ro mga eaeaki.
Sa pihak kara, ginpasaeamatan nana ro tanan nga mga nagbulig kana agud nga eowas nga maka-uli sa nasyon.
Raya hay sa pagpanguna it Bombo Radyo, Mr. Jack Arroyo it Overseas Workers Welfare Office ukon OWWA Region 6, Philippine Oversease Labor Office ukon POLO iba pang ahensiya it gobyerno, anang pamilya ag mga amigo/amiga sa Saudi.
Ginpaeag pa sigon imaw it anang mga amo engkaso nga magdesisyon nga mag-uli, apang naging hugut ro anang desisyon bangud sa pagkabaeaka sa posibleng matabu sa anang kabuhi kon magabuhay pa sa euyo it anang mga employer.
Nasayuran nga ro anang amo nga eaeaki ro naghatud kana sa airport pauli sa Pilipinas.
Si Beltran hay nag-agto sa nasambit nga nasyon may sang dag-on ag daywang buean eon ro nagtaliwan.
Nauna eon nga ginpahayag it OFW nga maskin nga nakaangkon it injury matapos nga mahueog sa hagdan ag naninahan it nabasag nga baso hay pilit imaw nga ginapatrabaho.
Maskin sigon ro anang agency nga ginaeauman kara nga magabulig kana hay ginpabay-an eamang imaw ag mas pang ginpaboran ro anang mga mapintas nga amo.
Ro pagmaltrato kay Beltran hay ginpaabot it anang pamilya sa Bombo Radyo.
