KALIBO, Aklan—Nakalista ro Municipal Civil Registrar it lokal nga gobyerno it Kalibo it pagtaas sa numero it mga gin-unga ag namatay ko buean it Abril it makaron nga dag-on kumpara sa kaparehong period ko nagtaliwan nga dag-on.
Base sa datos it nasambit nga taeatapan, nakalista it 275 nga birth registration ag 170 sa death registration ko Abril.
Suno kay Donnabelle Manalo, head it local civil registrar’s office nga sambilog sa mga posibleng rason sa pagnaba it birth registration ko nagtaliwan nga dag-on hay bangud sa mga ginpatuman nga restrictions tuga it covid 19 pandemic.
Kaibahan sigon sa mga problema ko nagtaliwan nga dag-on hay ro delayed registration it birth.
Nagnaba man suno kana ko rato nga tiempo ro mga nagpakasae kumpara makaron nga Abril nga nakalista it 25 nga nagbo-oe it marriage license.
Ko mga buean it Abril hasta Hunyo it nagtaliwan nga dag-on hay haeos owa sigon it nailistang marriage certificate tuga it COVID-19 restrictions kun sa siin bawae ro saeo-saeo.
Kada buean suno kana hay nagapasa sanda it report sa Philippine Statistics Authority ukon PSA.
Gindugang pa ni Manalo nga sa makaron hay padayun ro andang kampanya angot sa birth registration eabi eon ro mga misis nga nagdesisyon nga indi mag unga sa mga ospital ag iba pang lying-in clinics kun sa siin owa pa hapa-rehistro ro andang mga unga.
