NUMANCIA, Aklan—Uman nga naaresto sa Brgy. Camanci Norte, Numancia, aga-aga it Miyerkules, Pebrero 5 ro sangka preso nga naka-eskapo halin sa Banga Municipal Police Station.
Dikara natukiban it bombo news team halin sa anang ina nga si Dolores Ramirez nga ro matuod-tuod nga pangaean it suspek hay si Jerick Ocampo Ramirez ag alyas ukon dummy name eamang nana ro Stanley Mercado.
Nadakpan si Ramirez tubong Bansud, Oriental Mindoro matapos ro maeapnagon nga manhunt operation it pwersa it pulisya ag mga pumueuyu.
Si Ramirez hay nauna eon nga ginpaidaeum sa inquest proceedings, adlaw it Martes sa Aklan prosecutors office bangud sa patong-patong nga kaso nga anang ginapangatubang.
Sa uman nga pagbalik kana sa Banga Municipal Police Station, naghinyu sigon imaw sa anang escort nga pulis nga maga-ihi sa comfort room, apang kat makakita it kahigayunan hay nagpaeagiw pinaagi sa pagsamad sa sliding window ag nagdinaeagan hasta nga maka-abot sa Aklan River.
Nagpangalihid sigon imaw sa bibi it suba pinaagi sa pag-eangoy ag pagtikang, kun sa siin, ginsueod nana sa plastic bag ro anang eambong hasta nga naka-abot sa baybay it Camanci Norte, Numancia ag na-korner it mga awtoridad ag mga residente.
Ginsaysay man nana nga ginkabuliganan imaw nga bugbugon it mga pumueuyu rason nga nagapaeanakit pa ro anang eawas sa makaron.
Dugang pa nga nagutom imaw bangud nga owa it kwarta nga maibakae it pagkaon.
Ginpamalibaran man nana nga may gintakaw imaw nga baroto.
Bangud sa kawad-an it direksyon it anang kabuhi, matsa gusto eon lang sigon nana nga wakasan ro anang kabuhi.
Presenteng sa custodial facility it banga MPS ro nakatakas nga si Ramirez.
Bangud sa anang pag-eskapo, nadugangan pa ro anang kaso.
