KALIBO, Aklan—Temporaryong ginpaiway ro nakataeana kunta nga pagbisita ni PNP Chief Guillermo Eleazar sa probinsiya it Aklan sa petsa 22 it Agosto, adlaw it Dominggo.
Suno kay Police Col. Ramir Perlito Perlas, police director it Aklan Police Provincial Office (APPO) nga kahapon eamang kat makabatun sanda it tawag kon sa siin naga-imporma kanda kaangtanan sa pagpakansela it ginahimo nga preparasyon sa pag-abot it PNP Chief.
Nasayuran nga magahapit anay kunta sa probinsiya it Aklan ro PNP Chief antes nga magapadueong sa PNP regional office sa Western Visayas agud nga magserbe bilang guest of honor sa police service anniversary sa Agosto 24.
Samtang, nakataeana man kunta nga makipagpueong ro PNP chief sa mga katapo it kapulisan sa bilog nga probinsiya ag maga courtesy call sa mga chief executive ag para man nga makabo-oe it feedback sa chief executives sa naging performance it mga kapulisan sa tunga it COVID-19 pandemic.
