KALIBO, Aklan—Kaeabanan sa mga Sangguniang Kabataan (SK) officials hay gusto nga maextend ro andang termino.
Engkaso nga mapirmahan ni Pangueong Rodrigo Duterte ro proposisyon nga nagapaiway sa May 11, 2020 Barangay ag SK elections, magiging ap-at nga dag-on ro termino it mga presenteng opisyales nga nakapungko sa pwesto.
Suno kay Christine Hope Pagsuguiron, SK federation it banwang Malay, engkaso nga mapirmahan it presidente ro hagna, raya eon sigon ro andang tyansa nga makabawi sa mga pumueoyo kasunod it nakataeana nga pagrelease it andang pondo.
Halin suno kana kat nagpungko sanda sa pwesto hay uwa gid nanda nagamit ro SK fund bangud sa kakueangan it guidelines ag beyond eon sa anda nga kontrol.
Nagapati imaw nga igapursige ni Pangueong Duterte ro pagpaiway sa nasambitan nga eleksyon ag maging pabor man sigon raya kanda bangud sa kaabu-abu nga requirements ag accomplishment ro ginakinahang-ean it national government bukon eamang it sa anti-illegal drugs campaign kundi maging sa iba pang programa ag proyekto it gobyerno.
Nasayuran nga sa oras nga maging laye ro Senate Bill no. 1053, ro Barangay ag SK Elections hay igataeana sa December 5, 2022 matapos ro igapatigayong National Elections sa buean it Mayo sa kaparehong dag-on.
