Antique—Ginapatihan nga nakatueogan ro driver it kotse samtang nagamaneho rason nga nahueog raya sa suba sa boundary it Brgy. Masayo ag Brgy. Arobo sa Tobias Fornier, Antique pasado alas-11:45 gabi-i it sabado, Oktubre 19.
Raya ro ginpahayag ni Police Staff Sergeant Anthony Pelingon, imbestigador it Tobias Fornier Police Station sandig sa panaysayon it misis nga naka survive sa aksidente.
Nasayuran nga namatay samtang ginabueong sa ospital ro 40-anyos nga mister samtang nakaguwa eon sa ospital ro anang asawa.
Nakilaea ro namatay nga si Sheridan Sansaet, sangka seafarer ag ro anang misis hay si Bernadette Sansaet nga sangka nurse.
Dugang pa ni Pelingon nga natabu ro insidente samtang nga nagapauli sa Brgy. Villaflor ro mag-asawa.
Ginasugid bumunggo sa steel railings ro saeakyan antes nga nahueog sa suba.
Nakaguwa pa ro asawa sa saeakyan apang owa nabuligan ro mister sa driver’s seat tuga it sobrang kadaeum it tubi nga hasta sa hawak.
Mga pumueuyu sigon ro unang nagresponde sa aksidente.
