KALIBO, Aklan—Sa tunga it paeag it African Swine Fever ukon ASF, ginsunog it mga otoridad ro nakumpiska nga daywang bag-ong katay nga baboy sa magkaseparadong operasyon sa banwa it Kalibo.
Suno kay Dr. Jana Nepomuceno, Veterinarian 1 it Kalibo Municipal Agriculture Office nga ro nasambit nga mga baboy hay nakumpiska it Kalibo Bantay Karne Task Force.
Ro sambilog hay nakumpiska sa Brgy. Estancia, Kalibo bangud nga owa nag agi sa slaughterhouse, samtang ro sambilog hay sa Brgy. Linabuan Norte kun sa siin owa it nagakaigo nga permit ro meat shop ag ginasugid nga owa man nag-agi sa slaughter house.
Sambilog sa baboy hay nakataeana kunta nga paga-litsunon agud nga ihanda sa birthday party.
Ro mga ginkatay sigon nga baboy nga owa nag agi sa slaughterhouse hay makabig nga hot meat ukon botcha bangud nga owa nakapaidaeum sa inspeksyon.
Nasayuran nga sigidas makaron ro paglibot it nasambit nga task force sa bilog nga banwa it Kalibo.
Mag-eowas sa confiscation hay magapangatubang sa penalidad ro mga nagapanag-iya bangud sa pag-eabag sa naga eksister nga executive order ag ordinansa.
Kon mapamatud-an nga nagkasaea, raya hay may multang masobra sa P2,500 pesos ag pagkakulong nga sang buean hasta an-um nga buean.
Maabu eon sigon sanda nga nadakpan ag nakumpiska nga mga baboy ag pork products kun sa siin ro iba kara hay sa mga online sellers.
Base sa ordinansa it Kalibo, tanan nga baboy nga para sa public consumption hay nagakinahangean nga natatakan nga halin sa slaughter house.
