Namatay ko 2021 ro South African pastor nga si Siva Moodley apang ko Marso eang it makaron nga dag-on gin eubong ro anang bangkay bangud sa pageuam it anang pamilya ag mga tagasunod nga uman imaw nga magabangon halin sa kamatayon!
Si Moodley ro nagpatindog it relihiyong The Miracle Centre sa Gauteng, Johannesburg.
Ko Agosto 15, 2021, namatay imaw bangud sa sangka baeatian.
Apang imbis nga asikasuhon it anang pamilya ro eubong, gin aywan eang it mga raya ro anang bangkay sa morge bangud sa pageaum it mga raya nga uman imaw nga mabuhi.
Sa unang mga buean it pagkamatay ni Moodley, ginabisitahan ag ginadaehan pa it pamilya ag tagasunod ro anang bangkay sa morge apang ko ulihi hay nagpundo ro mga raya sa pag-agto.
Matapos ro masobra sa sang dag-on, gintestingan nga kontakon it morge ro pamilya ni Moodley agud nga boe-on eon ro bangkay it pastor.
Kat owa nakabaton it sabat, nagpasaka it kaso ro morge sa pamilya.
Kat makatau it bastanteng pruweba ro morge, nagdesisyon ro Gauteng High Court nga makaangkon it mandatory burial si Moodley.
Ko Marso 16, gin eubong si Moodley sa Westpark Cemetery sa Johannesburg.
Nagtambong ro mga igmangghud ag igbata kara apang owa eon ro anang asawa ag daywang unga.
Hasta sa makaron, owa pa nanda ginabaton ro pagkamatay it pastor ag maskin kan-o hay owa ginamitlang sa mga official social media accounts it The Miracle Centre ro angot kara .
