NEW WASHINGTON, Aklan — Sa pihak nga nalipay, apang ginkumpirma ni New Washington Mayor Shimonette Francisco nga owa pa sanda it may nabaton nga opisyal nga komunikasyon halin sa Philippine Ports Authority (PPA) angot sa napabalita nga uman nga pagbukas it Dumaguit Port sa nasambit nga banwa.
Suno kay Mayor Francisco welcome development ro modernisasyon it pantalan bangud nga uman raya nga magadaea it mas maabung oportunidad sa ekonomiya ag kaumwaran bukon eamang sa andang banwa kundi sa bilog nga probinsiya it Aklan.
Sa makaron hay owa sigon sanda it anuman nga ideya sa maging kalakaran ag kon sin-o ro magadumaea it pantalan.
Madumduman nga ko dekada 90, kilaea ro New Washington bilang nagapangunang pantalan sa probinsiya, apang amat-amat nga naduea sa indi nana masayuran nga rason sa pagtaliwan it mga dinag-on.
Base sa report, ro proyektong pag-ayos it pantalan hay nagabalor it ₱188.939 milyon nga gin-award sa MRBII Construction Corporation ko Nobyembre 6, 2023 it Philippine Ports Authority.
Magaserbi man raya nga RoRo berthing ag landing facility.
Ro pantalan hay paga-obrahon nga alternatibong aeagyan sa pag-eayag para sa mga banwa sa Eastern side it Aklan, kun sa siin, pilang kompaniya ro nagpromisa nga magasaylo it andang operasyon halin sa Caticlan Port paagto sa Dumaguit Port.
