KALIBO, Aklan — Nabayluhan ro kasubong nabatyagan it pamilya ni Army Scout Ranger 2nd Lt. Junibert Zonio matapos nga puros pagdayaw ag pagpasaeamat ro gin paabot kanda it mga kakilaea ag kaibahan kara sa trabaho.
Sa interview it Bombo Radyo, gin pahayag it anang amang si Joseph Zonio nga nakibot sanda sa rebelasyon it mga tawuhan it anang unga nga namatay raya matapos nga ibuwis ro anang kabuhi agud eowason ro anang siyam nga tawuhan nga puros naninahan sa bakbakan.
Owa sigon gin isipa it opisyal ro peligro sa pagsalbar sa anang mga tawuhan sa kasagsagan it bakbakan sa Bangsamoro Islamic Freedom Fighters (BIFF) sa Mamasapano, Maguindanao ku nagtaliwan nga dominggo.
Kahapon hay gin taw-an it arrival honor ro pag abot it bangkay ni 2nd Lt. Zonio sa Kalibo International Airport kun siin gin saluduhan raya it mga opisyal ag tawuhan it 12th Infantry Batallion.
Ro 32-anyos nga opisyal hay haeos limang buean pa eamang nga nakadestino sa Mindanao matapos nga maka-graduate sa training para sa pagka-opisyal it army.
Nakataeana konta raya nga magselebrar it anang kaadlawan sa Hulyo 11, 2018.
Gin ulila kara ro anang misis ag daywang dag-un nga ungang eaeaki.
Presenteng nakahaya ro anang bangkay sa andang baeay sa Barangay New Buswang, Kalibo, Aklan.
