KALIBO, Aklan—Nagaeaum ro NAPOCACIA Small Farmers and Homeowners Association nga maitao eon ro andang ginapangayo nga Resettlement Action Plan (RAP) ag kompensasyon sa mga pumueoyo nga apektado it expansion project it Kalibo International Airport.
Suno kay German Baltazar, Presidente it NAPOCACIA, dapat magpanaog eon ro Department of Transportation (DOTr) ag taw-an it Memorandum of Agreement ro lokal nga gobyerno it Kalibo para mag-intervene sa Resettlement Action Plan agud nga maayos ro mga kakueangan.
Suno kana, owa it komitiba nga nagadumaea sa RAP kamana man nga owa nakalista kung sin-o ro mga apektadong tag-ana it baeay ag eugta nga nabayaran ukon owa pa nabayaran.
Haeos ap-at nga dag-on eon sigon ro nagtaliwan apang maabo pa gihapon ro owa pa eubusang nabayaran.
Samtang, gintaw-an man it punto ni Baltazar ro kawad-an it aksyon it maskin sambilog nga opisyal ro gin-himo nga pagpang-harass kanda it Civil Aviation Authority of the Philippines (CAAP)-Aklan.
Bilang tanda it andang pagprotesta, nagpatindog it bandera ro NAPOCACIA sa palibot it expansion project it paeuparan nga pamatuod nga bukon pa it maayos ro mga apektadong tag-ana it eugta.
Gin-insister pa kara nga owa sanda nagabaeabag sa pag-umwad it Kalibo International Airport apang dapat sigon nga ayuson ro proseso ag itao kanda ro nagakadapat nga kompensasyon.
