BUSINESS News–Ginbulgar it National Power Corporation nga nagaabot eon sa P1-B ro ginkalugi kara kada buean.
Raya hay bangud sa mataas nga volatile price it diesel fuel, nga nagatueod sa pagtinguha nga i-hybridize ro mga planta it kuryente nga ginapagana it diesel sa mga lugar nga una sa guwa it grid.
Suno kay Napocor president and chief executive officer Fernando Roxas, ro diesel rates it anang opisina hay gindisenyo para makabawi it P35 kada litro.
Apang ro presyo it diesel fuel sa makaron hay padayon ro pagtaas it hasta sa P70 kada litro nga nagaresulta it mas mabahoe nga pagkalugi it andang korporasyon nga naka in charge sa pag operate it small power utilities group power plants sa mga off-grid areas.
Sa makaron hay naga-operate ag nagmentain ro Napocor it 281 mostly diesel-fired small power utilities group power plants sa tanan nga 189 munisipalidad it Pilipinas.
Bangud kara hay naghinyo ro Napocor it pautang sa government bank nga nagaabot sa P15 bilyon.
Ro Napocor hay nakabuoe eon it P5 bilyon ag ro nabilin nga P10 bilyon hay nagakinahang-ean pa it pag-apruba it Monetary Board ag sangka sovereign guarantee halin sa Malacañang.
Kon mabuoe ro kabilugang P15 bilyon, abuton sigon it ap-at nga dag-on ukon hasta it 2027, ro kumpanya para eubus nga mabayaran ro utang kara.
