KALIBO, Aklan—Gin-insister it National Police Commission ukon NAPOLCOM-Western Visayas ro importansiya it mayad nga police community relations kadungan sa selebrasyon it Police Regional Office it 28th Police Community Relations ukon PCR Month nga nag-umpisahan ko Hulyo 3, 2023 ag magatapos sa Hulyo 27 sa Camp Delgado.
Ginpahayag ni Atty. Joseph Celis, Napolcom regional director nga ro epektibong law enforcement hay eubus nga nakadepende sa mayad nga police community relations.
Ko nagtaliwan nga mga dinag-on hay gintukod sigon nanda ro community service oriented policing, kun sa siin tuyo kara nga makaangkon it mas mabaskog ag sistematikong pakikipagbueuligan sa tunga it Philippine National Police ukon PNP, komunidad ag local chief executive ukon ro alkalde it sangka banwa.
Gindugang pa kara nga kon may pagsalig ag suporta it publiko, makapatigayon it madinaeag-on nga imbestigasyon ro kapulisan.
Kadungan kara, ginpasiguro ni Atty. Celis ro andang suporta sa PNP sa pagtinguha nga mataw-an it mayad nga serbisyo ro komunidad.
Ro ginpirmahan nga presidential proclamation no. 764 nga ginpirmahan ko Enero 24, 2005 hay nagadeklara sa kada buean it Hulyo kada dag-on bilang PCR Month agud nga ma-develop ro mas maeapit nga relasyon it pulis ag komunidad.
Ro tema makaron nga dag-on hay “Serbisyong Nagkakaisa para sa Ligtas at Maunlad na Pamayanan”.
