KALIBO, Aklan — Ginpamalibaran it Banga Police Station ro unang napabalita nga may nakitang gin-abandona nga eapsag nga babaye sa sangka basurahan sa prente it munisipyo it Banga.
Sa interview it Bombo Radyo, ginpahayag ni P/Staff Sgt. Randy de Pablo it Banga PNP nga napa-aku nanda ro 27 anyos nga babaye nga imaw ro ina it eapsag .
Sa andang pag-imbestiga, plano kunta it babaye nga itago ro anang pag-unga sa pagkabaeaka nga uman imaw nga aywan it anang live-in partner nga kon sa siin hay may anda eon nga daywang unga nga puro eaeaki.
Nasayuran nga ro babaye hay residente it Brgy. Tinigao, Kalibo, apang nagapangamuhan sa banwa it Banga.
Suno kana nga ko Biyernes nga adlaw imaw nag-unga sa baeay it anang amo.
Nagbueag sigon sanda it anang mister ko buean it Hunyo 2018 ag nagpanaw raya sa Palawan agud nga magtrabaho bilang construction worker, apang uman sanda nga nagkabalikan ko Pebrero 2019 .
Sa andang pagbueag hay nakaangkon raya it ibang karelasyon nga gina-alegar nga taga banwa it Altavas nga imaw ro naka-nabdos kana .
Maskin nga manug-unga hay owa sigon nataeupangdan it anang live-in partner nga imaw hay nabdos ag nag-eaum nga nagtambok eamang imaw .
Madumduman nga nauna eon nga nag-report ro babaye sa Kalibo PNP nga may anang nakitang eapsag sa basurahan nga nagadugo pa ro pusod.
Insigida raya nga gindaea it pulisya sa provincial hospital .
Sa follow-up investigation it mga otoridad, sa pag-review sa CCTV maeapit sa lugar, owa it may nakita nga makarondaya nga insidente sa lugar.
Ginpahayag pa ni staff Sgt. de Pablo nga pinaagi sa andang laygay hay nagpahayag it kahauman ro mister nga batunon ro gindangatan it anang live-in partner ag pagakabigon nga matsa anang kaugalingon nga unga ro eapsag.
