KALIBO, Aklan — Kapin sa 85 nga tribu it Ati-Atihan, mga Balik Ati, ag modern group ro uman nga maga-ililiba ag magapakitang gilas para sa pinaka-magarbong pagbukas it Kalibo Ati-Atihan Festival 2026 sa maabot nga Oktubre 8 hasta 11, 2025.
Suno kay Boy Ryan Zabal, chairman it Sadsad Committee it Kalibo Ati-Atihan Festival Board (KAFEB), masobra sa 4,200 drummers ro ginaeauman nga magapasakop agud nga ipakita ro andang talento sa pag-umpisa it ginakaeangkagan nga Opening Salvo showdown.
Ro sneak peak ukon ginaeauman nga matabu sa 2026 Ati-Atihan Festival hay maga-umpisa bandang alas-3:30 it hapon nga magatau it kabuhi sa karsada pinaagi sa dueueungan nga patik it tamboe halin sa mga nagpasakop nga banda nga naghalin sa mga banwa it Malinao, Ibajay, Altavas, Numancia, New Washington, Banga, Libacao, Makato, Lezo, Kalibo ag iba pa.
Ro ‘Sadsad’ ukon street dancing hay ginaeauman nga magiging sangka masadyang hitabu nga paga-umpisahan sa Mabini Street sa may Aklan Provincial Hospital.
Ro ruta it unang grupo hay maga-agi sa Cor. Arch. Reyes St. samtang ro ikaywang grupo mat-a hay maga-agi sa XIX Martyrs St., ag pagkatapos hay magatabu sa Kalibo Pastrana Park.
Pagapangunahan nanday Kalibo Mayor Juris Sucro ag Vice Mayor Philip Yerro Kimpo ro opisyal nga pagbukas it programa sa alas-6:30 it gabi-e nga pagasundan it sangka fireworks display.
Todo man ro pagpahaum para sa Elias JTV band nga maga perform it live sa Kalibo Pastrana Park bandang alas-10:00 it gabi-e, kun sa siin, pormal nga igapapundo ro street dancing sa sueod it festival zone.
