KALIBO, Aklan—Nagaeaum ro mga opisyales it Brgy. Tambak, New Washington nga eubusan eon nga maayos ro nasamad nga seawall sa andang barangay.
Suno kay Punong barangay Lucille Macario nga bukon pa it sigurado kung maeakip ro seawall sa mga proyekto nga pagabutangan it pondo it Department of Public Works and Highways (DPWH)-Aklan makaron nga dag-on.
Sa pihak kara, ginkalipay man ni Kapitan Macario ro madasig nga pag-aksyon it taeatapan kung siin insigida sanda nga nagtambak it mga mabahoe nga bato ag sandbagging bilang temporaryong solusyon sa problema.
Nagbutang man sigon sanda it pila ka mga signages para magserbing paandam sa mga pumueoyo.
Raya hay bangud nagapabilin nga delikado ro pag-agi sa porsyon it narumpag nga parte it seawall.
Ro pinaka-apektado sigon kara hay ro mga mangingisda bangud idtu sanda nagaparada it andang mga baroto.
Sa pihak nga parte, ro gina-problemahan makaron ni Kapitan Macario hay ro sigidas nga pagtambak it mga tawuhan it DPWH sa road widening project sa andang barangay.
Kung masyadong mabaskog sigon ro humbak hay masami eon nga ginabaha ro mga panimaeay maeapit sa lugar.
Suno sa opisyal, owa eon it gina-agyan ro tubi bangud naubos eon it pagtambak ro gina-eapusan kara.
Ginpaabot eon man sigon nanda ro problema sa taeatapan apang owa pa sanda it naging sabat.
